OORDENKING

Volhard in jou geloof. Dra in alle omstandighede God se liefde uit !

Het u ook die opmerking gehoor: ‘As dit is hoe ‘n Christen se lewe lyk, wil ek liewer nie ‘n Christen wees nie.’ Gewoonlik ‘n opmerking vanaf iemand wat nie so ‘n getroue kerkganger is, gemaak teenoor ‘n gelowige wat getrou is in sy godsdiensbeoefening. En die rede vir so ‘n opmerking is gewoonlik dat die belydenis van so ‘n gelowige nie strook met sy manier van lewe nie. En nou weet ons dat so ‘n opmerking nie heeltemal waterdig is nie, want ‘n mens wy nie jou lewe aan God bloot op grond van ander mense se optredes nie, maar op grond van God se bemoeienis, Sy genade, vergifnis wat jy elke dag ervaar . Tog het dit my laat wonder oor dit wat ons gemeente aan die wêreld kommunikeer. Kommunikasie is so ‘n groot deel van ons moderne wêreld. Dink maar net hoe die rekenaar met E-pos as kommunikasiemedium die wêreld op sy kop gekeer het. Die Bybel gee ook aan ons riglyne hoe om te kommunikeer. Hoe om as beelddraers van God, te praat en te doen. I Petrus 2:12 sê: `Gedra julle altyd goed onder die heidene sodat, al praat hulle kwaad van julle asof julle misdadigers is, hulle julle voorbeeldige lewe kan sien en God kan verheerlik op die dag van afrekening.' In ander woorde gesê: Al beledig iemand jou, al het jy die geleentheid om kwaad met kwaad te vergeld, praat op so `n wyse van ander sodat jou optrede tot voorbeeld kan strek. Hoekom? Want daardeur word God ons Vader verheerlik! En dit is dalk die probleem met ons wyse van kommunikeer. Al te dikwels wil ons onsself handhaaf, ons eie stempel en wil afdwing, in stede daarvan dat God deur ons optrede en woorde verheerlik moet word. Ook Efesiërs 4:29 sê iets oor ons wyse van praat. `Vuil taal moet daar nooit uit julle mond kom nie; praat net wat goed en opbouend is volgens die eis van omstandighede, sodat dit julle hoorders ten goede kan kom.' Hoe maklik is dit nie om iemand af te kraak tot voordeel van myself nie, maar hoe moeilik het dit nie geword om tot voordeel van ander iets opbouend oor en van hulle te sê nie! In II Korintiërs 3:3 skryf Paulus: `Dit is tog duidelik dat julle `n brief van Christus is..........' As gelowiges by wyse van spreke briewe van Christus is, dan moet daar tog iets van die liefde, empatie en genade van Jesus Christus in ons lewe sigbaar wees. Wat kommunikeer ek as kind van God aan die wêreld? Wat lees die mense by die werk, my bure, my skoolmaats, gemeentelede in my lewe raak - ek wat `n brief van Christus is ! Lees hulle iets van die liefde van God in my lewe raak, geduld en verdraagsaamheid, warmte en mededeelsaamheid......... Of sê hulle ook van my lewe: `As dit is hoe `n Christen se lewe lyk, wil ek nie `n Christen wees nie.' Die feit van die saak is: Deur my wyse van kommunikasie kan ek God so verheerlik dat mense my nie meer raaksien nie, maar die liefde van God wat in my hart leef, en uitmond in my woorde, dade en optrede! Om kwaad met kwaad te vergeld is nie `n kuns in die lewe nie. Van die sogenaamde beste tot die slegste kan dit regkry. Nee, die kuns van die lewe lê om in alle omstandighede die liefde van God uit te straal. Dit vra volharding en oefening.

Ds. André Thomas

TERUG NA BO

WELGELEGEN WENSE

Jakkie v.d. Linde se Vader {Wimpie se Oupa} is oorlede. Ons meegevoel gaan uit na hierdie gesin en ons bid dat die Here julle sal troos met die wete dat Hy julle met toewyding sal dra in hierdie tyd van hartseer.
Tant Grieta Joubert is ernstig siek. Ons bid dat die Here met u sal wees in hierdie tyd. Dat beterskap sal intree en dat u, as dit die wil van die Here is, spoedig weer gesond sal wees.
Pieter Velloen en Nikki Korf is in die huwelik bevestig. Ons wens julle alles van die beste toe op jul nuwe lewenspad.

TERUG NA BO

FOKUS 40 +
DEELNAME = TOEWYDING

Die tema vir hierdie maand is toewyding en dit het my dadelik aan die Fokus 40 projek laat dink. Meeste van ons lidmate sal onderneem om elke Sondag se erediens by te woon, elke dag 'n hoofstuk uit die boek te lees en sewe Bybelstudie-byeenkomste by te woon. Die projek-spanne is hard besig om alles te organiseer sodat almal, van kleuter tot bejaarde, betrokke sal wees en welkom sal voel. Waar kom die toewyding nou eintlik in? Ons het dit alreeds belowe toe ons belydenis van geloof afgelê het, want toe het ons beloof dat ons onsself diensbaar maak en na die beste van ons vermoë en met toewyding die groei en vooruitgang van die Nederduitsch Hervormde Kerk van Afrika sal bevorder. My toewyding sal my dus na die sewe weke van Fokus 40, elke Sondag daarna bring na die erediens om my dankbaarheid te toon en met blydskap God in gebed en sang te loof, en deur die verkondiging van die woord my geloof te versterk.
BETS BOOYSEN

TERUG NA BO

VOORDAT DIE HAAN KRAAI ......

Daar word die mooi storie vertel van die eerwaarde dominee wat ‘n klein bietjie verstrooid was. Of die verhaal waar is; die weet ek nie, maar dit het my altyd met ‘n glimlag gelaat. Terloops, ek vertel dit met groot eerbiedigheid. Die ouer dominees sou kon vertel hoe skeef dinge op ‘n begrafnis kon verloop. Alles is nog goed en wel tydens die begrafnisdiens. Maar as dit by die graf self kom, is ek altyd meer bewus van alles wat so maklik kan verkeerd loop.
En so was die blykbaar ook met die eerwaarde dominee gewees. Alles het goed afgeloop in die kerk en die stoet het die stadige, lang draai gemaak met die begraafplaas reg voor hulle. Die draers was daar, die graf was reg voorberei vir die teraardebestelling. En in ‘n gedempte atmosfeer is daar aanbeweeg na die graf. By die graf is daar gelees uit die Bybel, ‘n gebed is gedoen. Toe maak die dominee sy Diensboek oop. Dit is daardie wit boekie wat elke predikant op sy rak het. Dit bevat onder meer die ordes hoe ‘n erediens verskillend kan plaasvind wat die orde en volgorde betref. Dit bevat al die bevestigingsformuliere rakende die huwelik, ampsdraers en die formuliere vir die doop en die nagmaal. Terloops, as daar nou een plek op aarde is wat ek al soveel keer na nog ‘n stel hande of twee verlang het, was dit juis op hierdie moment ! Want gewoonlik het jy jou Bybel by jou, die Diensboek, en as dit reën ‘n sambreel plus nog ‘n hand vol sand.
Die eerwaarde dominee het blykbaar sy Diensboek oopgemaak. Die twaalf artikels is voorgelees terwyl die kis gesak het. Daar was ‘n oomblik van stilte, ‘n pouse, net om seker te maak dat alles met die teraardebestelling vlot verloop het. En toe breek die moment aan waar jy die begrafnisformule uitspreek wat eindig met van stof tot stof. Die ou begrafnisondernemers het nog die mooi gewoonte gehad om ‘n klein botteltjie spier wit sand op hierdie stadium in die predikant se hand uit te gooi. Deesdae moet jy sommer self buk (met al die boeke in jou hand !) en self tussen die grond en kluite bietjie raap en skraap vir sand. Terwyl jy dan die woorde van stof tot stof uitspreek, strooi jy hierdie wit, fyn sand of dan die raap-en-skraap-sand oor die kis wat alreeds in die graf afgesak het. Daarmee is `n predikant se taak by die graf so te sê afgehandel, en kan jy ontspan en dank omdat alles goed afgeloop het.
Toe gebeur dit. Die eerwaarde dominee tree vorentoe met die Diensboek in die een hand, en die hopie sand in die ander. Hy doen die nodige, spreek die begrafnisformule uit wat eindig met van stof tot stof en hy maak sy hand oop sodat die grond kan val. En toe hoor hy dit, ‘n dowwe plofgeluid soos sy Diensboek afval.........
Hierdie verhaal (ekskuus aan die eerwaarde dominee met wie dit gebeur het) vertel ek omdat ek glo daar ook ‘n belangrike lewensles in is. Die tragiese gevolge wanneer ons die verkeerde hand oopmaak. Die konsekwensies as ons ons handgreep laat los op die regte of verkeerde dinge. Hoeveel keer wil ek nie my hand in liefde oopmaak, maar voor ek my kon kry bal ek ‘n vuis. Of soms wil jy jou hand van genade en vergifnis oopmaak sodat die geur van liefde jou naaste se lewe vul. Maar as jy jou weer kon kry maak jy jou ander hand oop – die hand van woede, haat en jaloesie.
Terwyl ons op pad was na die kruisgebeure op Goeie Vrydag het Petrus se haan wat kraai my weer opgeval. Dit het my skaam gemaak om te dink dat ek ook soos Petrus is wie my Heer verloën, terwyl die kruis juis simboliseer dat God Sy Hand van liefde weer oopmaak oor elkeen se lewe. Voordat die haan kraai, Petrus............. en die Petrusse van die wêreld het jy jou Heer verloën. Het jy weer die verkeerde hand van onreg en jaloesie oopgemaak.

Ds. André vanuit die pastorie

TERUG NA BO

DIE KIERIEKLUB…

was wèèr bymekaar!!! Die byeenkoms het so half gedemp begin, want ons voorste Kierie, Magriet, was afwesig. Namate die aand gevorder het, het ons almeer gedemp geraak, want ds. Du Preez het 'n kits-impromptu-Bybelvasvra voorberei! 'n Mens kon hoor hoe dink die groep aan al die antwoorde! As 'n mens dink jou Bybelkennis is redelik, gaan dink weer! Verroes was nie die woord nie! Nie te min was dit weereens 'n baie gesellige kuier-aand, en ons wil amper {!} vir ds. Du Preez uitnooi, nèè UITDAAG om ons te probeer vasvra as ons geleentheid gekry het om voor te berei! {Net geen vrae oor geslagsregisters nie! Laat ek bieg, ek slaan dit gewoonlik oor!}
KIERIE BETS BOOYSEN

{Die ander Welgelegen Aksies kan die koppe in toegewyde skaam-wees laat sak teenoor die flukse, gereelde en lewendige Kierie-klub bydraes in die WELVERTEL. Veral dan as jy in gedagte hou dat dit ons seniors is…. {!!?} Dit laat die vraag ontstaan: Is dit die ènigste aksie wat lèwe?!! {Red}

Kom ons lees saam uit die Bybel.

TERUG NA BO

DAGSTUKKIES VIR APRIL 2005!

Liewe Leser, die dagstukkies wat ds. Andrè so getrou elke maand aan ons voorsien om te gebruik, is 'n groot werk en is voorwaar 'n voorreg wat ons het. Kom laat ons dit met dankbaarheid nie alleen ontvang nie, maar ook ten volle GEBRUIK en benut. Knip dit uit, bêre dit en gebruik dit oor en oor. Dit kan tog nèt tot seën wees vir jou. Jy kan dit in jou eie persoonlike stiltetyd gebruik of tydens huisgodsdiens. Of deel dit uit aan ander of gebruik dit waar jy 'n vergadering of byeenkoms moet open. As ouderling, kan jy dit ook as 'n riglyn gebruik wanneer jy huisbesoek doen.
Ds. Andrè, baie dankie. Ons waardeer dit wat u met soveel liefde en toewyding aan ons gee.

TERUG NA BO

OM TE LEES

Betsie Boekwurm het hierdie maand een van ons Kerk se prestige publikasies onder oë gehad, nl. Die Hervormde Teologiese Studies. Dit is voorwaar 'n prestige publikasie, want ek glo daar is nie 'n gereformeerde teologiese departement wêreldwyd wat dit nie in die biblioteek het nie. Alhoewel dit 'n teologies-wetenskaplike publikasie is, is daar tog artikels wat die gewone lidmaat sal interesseer. Ek verwys graag na die artikel van P.R.Schoeman: Die Voorwetenskaplike geskiedsbewussyn en vroeë wetenskaplike geskiedskrywing in die Nederduitsch Hervormde Kerk. Hy trek 'n lyn deur vanaf Prof. S.P. Engelbrecht se doktorale tesis. Ons is vandag met soveel ander aspekte van die Kerk besig, dat ons skaars tyd het om ernstig met ons Kerk se geskiedenis bemoeienis te maak. Hy sê: “Die Skrif leer dat die verlede 'n groter verantwoordelikheid plaas op die hede, met die oog op die toekoms.” Daar verskyn ook diè woorde: “….as die gebeurtenisse van gister die verantwoordelikheid van vandag swaarder maak ten opsigte van die dag van mòre, dan moet ons die gebeurtenisse van gister ken.” Gaan lees gerus die artikel. Nog 'n artikel wat u gerus kan gaan naslaan is dié van A.W.G. Raath oor die pioniersvrou, Hester Venter. Die HTS is op die rak in die Kerkkantoor.
BETSIE BOEKWURM

TERUG NA BO

HOEKOM KERK TOE GAAN.

'n Persoon skryf aan 'n tydskrif en kla dat dit vir hom geen meer sin maak om kerk toe te gaan nie. Hy gaan al vir meer as 30 jaar kerk toe, het gedurende hierdie tydperk na ongeveer 3 000 preke geluister maar kan nie een onthou nie. Hy dink hy mors sy tyd en die predikante mors hulle tyd deur al hierdie preke voor te berei en Sondag vir Sondag te preek. 'n Paar weke later reageer iemand op die artikel as volg: “Ek is reeds 30 jaar getroud. Gedurende my getroude lewe het my vrou ongeveer 32 000 etes voorberei. Maar net soos jy kan ek nie een van die spyskaarte onthou nie. Maar dit weet ek, al daardie etes het my gevoed en versterk, as dit nie vir daardie etes was nie sou ek vandag dood gewees het. Dieselfde geld ook vir die kerk. As ek nie gegaan het om geestelik gevoed te word nie sou ek vandag geestelik dood gewees het. Wanneer jy af is, is God besig met iets. Geloof sien die onsigbare, glo die ongelooflike en ontvang die onmoontlike. Dank God vir ons Fisiese en Geestelike voeding.
Ingestuur deur
GEORGE MARAIS

TERUG NA BO

PERSPEKTIEF OP DIE WAARDE VAN TYD